विद्यालयले २० वर्षदेखि अध्यापन गरिरहेका शिक्षकहरुलाई गत चैतमा निस्कासित गरेको सूचना दिएको थियो । त्‍यतिबेला शिक्षकहरुले सुविधा माग गरेपछि विद्यालयले मौखिक रुपमा सहमति गरेको तर अहिले उक्त सहमति विपरीत फेरि शिक्षकहरुलाई निष्कासित गरेको पुनः इमेल पठाएर बेवास्ता गरेकोले आन्दोलनमा उत्रिनु परेको एक शिक्षिकाले गुनासो गरिन् ।

उनले भनिन्, ‘विद्यालयले आर्थिक समस्या देखाएर निकाल्न पाउँछ तर त्‍यसको पनि एउटा विधि, प्रकृया हुन्छ नि। यत्तिकै इमेल, हुलाकबाट पत्र पठाएर निष्कासित गरेर हुन्छ ?’ निष्कासित शिक्षक, शिक्षिकालाई पन्ध्र महिनादेखि न्यूनत्तम तलबको आधा मात्रै दिँदै आएको र उक्त बाँकी तलब पनि पाउनुपर्ने माग राखेर आन्दोलनमा उत्रिनु परेको शिक्षकहरुको भनाइ छ ।

विद्यालयले निष्कासित गरेपछि त्यहाँ रहेका थप शिक्षकहरुले पनि अनलाइन कक्षा बन्द गरेको उनले जानकारी दिइन् । विद्यालयले ६ जना शिक्षकलाई समेत ‘घरमा बसेर सहयोग गरिदिनुहोला’ भनेर एक शिक्षकले जानकारी दिए ।

उनले भने ‘ काम गरेको तलब पनि आधा मात्रै दिने । अहिले पनि घरमा बसेर सहयोग गर्नु भन्‍ने ? हामी चाँहि कसरी बाँच्ने ?’ आन्दोलित शिक्षकहरुले तत्काल वार्तामा बोलाउनुपर्ने र वार्तामा नबोलाएसम्‍म दैनिक आन्दोलन गर्ने चेतावनी दिएका छन् ।