सरकारले एलपीजी ग्यासको मूल्य दोब्बर गरेपछि सुरु भएको विरोध प्रदर्शन हिंसात्मक बनेको हो । देशव्यापी रूपमा इन्टरनेट सेवा बन्द गरिएका कारण कजाखस्तानमा वास्तवमा के भइरहेको छ भन्ने प्रस्ट थाहा हुन नसकेको निगरानी समूहहरूले जनाएका छन् । रुसले कजाखस्तानका राष्ट्रपतिको आग्रहपछि सुरक्षाफौज पठाएको बताएको छ । बढ्दो अशान्ति नियन्त्रणका लागि मद्दत पुर्‍याउन अनुरोध गरेपछि सेना पठाएको मस्को नेतृत्वको सैन्य गठबन्धनले जनाएको छ ।

रुसी विदेश मन्त्रालयका प्रवक्ता मारिया जाकले ‘स्थितिलाई स्थिर र सामान्य बनाउन निश्चित समयका लागि कजाखस्तान गणतन्त्रमा सामूहिक सुरक्षा सन्धि संगठन (सीएसटीओ) को शान्ति सेना पठाइएको’ जनाएका छन् । सीएसटीओमा रुससँगै बेलारुस, आर्मेनिया, ताजिकिस्तान र किर्गिजस्तान सदस्य छन् । यद्यपि, रुसी विदेश मन्त्रालयद्वारा जारी विज्ञप्तिमा कति समयका लागि सेना पठाइएको हो भन्नेबारे उल्लेख छैन । ‘सेनाको मुख्य कार्य कानुन कार्यान्वयन निकायलाई सहयोग गर्नु हुनेछ,’ विज्ञप्तिमा भनिएको छ ।

भ्रष्टाचार, गरिबी र बेरोजगारीको समस्या बढेको भन्दै जारी प्रदर्शन सरकारले ग्यासमा मूल्य बढाएपछि आइतबारदेखि चर्केको हो । प्रदर्शनकारीले बुधबार अल्माटीको मुख्य प्रशासनिक भवनका साथै सरकारी कार्यालयहरूमा पसेर आगो लगाइदिएका थिए । कजाखस्तानका राष्ट्रपति कास्यम जोमार्त तोकाएभले ‘विदेशमा तालिम लिएका आतंककारी गुन्डा’ ले समस्या निम्त्याएका भन्दै देशव्यापी संकटकालको घोषणा गरेका छन् ।

https://unelma.io/igfM7